مكنش ينفع افكر كده وانا مخنوقه لاني أكيد كنت هخرف
بس في مره من المرات وانا راكبه جنب الشباك _ جلستي المفضله _
سرحت في الخضره وفكرت شويه
هو إحنا ايه مشكلتنا؟
عقلي:مشكله واحده يا فصيحه :D
أنا: لا يعني أقصد هو احنا ليه بنزعل وليه بنكد علي روحنا؟
عقلي: عشان في مشكله يا ام العريف
انا: طيب وليه نزعل علي مشكله
عقلي: عشان هي مشكله والطبيعي ان المشكال بتزعل
انا: طيب ماهو في ناس مش بتزعل اوي ومش بتكتئب أوي يعني أكيد معندهمش حته ناقصه في الجهاز العصبي
عقلي : وبعدين يعني؟ اليوم كان طويل وانا عايز انام شويه
أناا :لا هتنام اما انا انام لكن انا مزاجي دلوقتي أفكر
عقلي: اوكي خليني معاكي
أنا: هي المشكال بتتقسم ازاي؟
عقلي: علي حسب ,,
في مشاكل احنا بنعملها لنفسنا بنكبرها يعني
وفي مشاكل الناس بتتسب فيها
وممكن تتقسم لمشاكل نقدر نحلها ومشاكل منقدرش عليها
أنا : إممممممممم
عقلي : وفي مشاكل عاديه يوميه متتسماش مشاكل صغيره مينفعش تكبر
لكن في حاجات كبيره اوي ازم ناخد فيها قرار سريع
أنا : أه فعلا
طب ماهي المشاكل اللي انا بتسبب فيها لنفسي دي حاجه بشعه
انا أعمل كده فيا ليه؟
يعني ابقي عارفه كويس أوي من الاول اني هتعب وان الموضوع بايظ وع ذلك بكمل
ده غباء علي فكره
عقلي : الله ينور عليكي ,, لسه واخده بالك دلوقتي :D
أنا : والمشاكل اللي بيتسبب فيها الناس غالبا محدش منهم بيتألم الا انا
وانا انا اوجع ليه دماغي
ليه أفكر في الناس وأنسي انا نفسي
مانا زي ما هتحاسب لو ظلمت حد هتحاسب لو ظلمت نفسي
هتحاسب لو وصل ظلمي لنفسي اني ازعل لدرجه المرض والقلق وحااجات كتير
عقلي: ومش هتاخدي حقك منهم
أنا : والمشاكل اللي ليها حل ما أحلها وأخلص أفضل اتألم ليه؟
عقلي: بس الحل بيوجع علي فكره
أنا: وماله ؟ ,, مفيش حد بيخف من غير وجع ومفيش حلاوه من غير نار
ومفيش راحه من غير تعب
عقلي : واللي ملهاش حل
أنا: الصبر من عند الله هو حلها
أعتقد اننا ابتلينا بيها اصلا عشان نصبر
عقلي : وأحيانا بنصبر للأخر ,, مش ك حاجه لازم ناخدها في الدنيا
الدنيا دي مجرد زيف وقشره ملونه للأسف بنتخدع بيها لحد ما تيجي وتخلص نلاقي حاجه تانيه
نلاقي القشره الملونه إتكسرت و طلع منها كل اللي انت مليتها بيه ,, وتشوف بقي القشره الحقيقه في الأخره
تشوف الشريط اللي سجلته طول حياتك هينطق بقي يقول ايه؟ في الأخره
أنا : الأخره .!!!!!!!!
ايه .؟ الاخره؟
نهايه العالم .؟ يوم القيامه؟
بعدين.؟
في عز ازماتنا كلنا كلنا بنتمني انتقام ربنا من الظالم دلوقتي
وبنتمني ننسي دلوقتي
وبنتمني اننا ناخد حقنا دلوقتي
عايزين ربنا يكافئنا دلوقتي
والعجيب
انه لو حصل وخدنا اللي نعوزه ده
مفيش نار بتخف اوي .!
وبنقول برضه في حاجه إتكسرت مش هتصلح
ليه.؟
فكرت شويه كمان وسرحت ورجعت لورا
الصحابه
أيوه الصحابه
إفتكرت تحديدا واحد بس منهم
أعرابي أسلم بين يدي الرسول عليه الصلاه والسلام فأعطاه بعض المال
فقال : يا رسول الله , ما علي هذا بايعتك.!
فقال رسول الله صلي الله عليه وسلم : علي ماذا بايعتني؟
قال : بايعتك علي أن يأتيني سهم طائش فيقع هنا ( واشار إلي حلقه ) ويخرج من هنا ( وأشار الي رقبته )
قال له : إن تصدق الله يصدقك
وحضر المعركه وجاء سهم طائش نفذ من عنقه ولقي ربه راضيا مرضيا
ايه ده.؟
الرسول عليه الصلاه والسلام كان يقول من يفعل كذا ويكون رفيقي في الجنه؟
من يفعل كذا ويدخل الجنه؟
الرسول مكانش بيوعد الناس بمال ولا جاه ولا سعاده في الدنيا
كانت هذه الاخره عندهم زي بكره بتاعنا اللي بنفكر فيه
زي ما بفكر كده الصبح بكره راحه فين وهعمل كذا
هما كانوا بيقولوا ان ممكن بكره نقابل ربنا
مكانوش منعمين
بالعكس كانوا تعبانين ويشقون ويجاهدون طردوا وذلوا وتعبوا وكل حاجه
ومع ذلك باعوا كل نار الحقد والحنق والغضب لشراء الجنه بصبرهم
عقلي : إحنا في عز أي حاجه بننسي ان في أخره هناخد فيها حاجات كتير ممكن منقدرش نحققها هنا
مش بتحب نسيب حاجه ناخدها بعدين
تصدق إحنا أغبيا أوي :(
ليست هناك تعليقات:
إرسال تعليق