من صيدله,, خلاص يا ماما موافق !! أصل الراجل ميعيبوش إلا جيبه !!

الأبطال

حماده وطنط فافي
طنط كوتا وطنط فتحيه وطنط جيجي والكثير من الطنطات بلا داعي
الغلبانه المستكينه

حماده اسم الله عليه خلص كليه تجاره في 7 سنين اسم النبي حارسه وصاينه
واتخرج الحمد لله وبعد ما _كرف _ تهاني البنت رفيقه كفاحه اللي رافقته 4 سنين
اصله لقاها مش جايبه همها وقالها بالفم المليان
هنشحت سوا يا حبي
ثقي اني بحبك جدا
لكن مينفعش

جري حماده علي طنط فافي يوم تخرجه
وقالها : يا ماما فين هديه تخرجي؟
ضحكت الام ضحكه تشبه ضحكه ماري منيب حماتك مدوباهم اتنين
وقالت له : عروستك عندي يا واد

نظر اليها حماده نظره بلهاء تشبه كثيرا نظره فؤاد المهندس في سلسه انت اللي قتلت بابايا

قالت له : حلوه

قالها : عادي كل البنات حلوين


قالت له : من عيله

قالها : هيهيهي عادي يا ماما

ماهي القطط لها عيله برضه

نظرت الام نظره شرسه

وقالت له : حزر بقي

صيدلانيييييييييييه

قفز حماده من الفرح وسرح في خاطره متخيلا بنك الفلوس اللي هينزل علي دماغه وصاح

نروح نخطبها بكره يا ماما

وفعلا راحو يخطبوا الغلبانه المستكينه الحزينه

خريجه الصيدله بعد الجهد والعرق والبلاوي الزرقا

سألت امها : وبيشتغل ايه بقي بسلامته يا ماما؟

قالت لها : لسه يا عنيا

ده يدوبك متخرج

تعبان ف الكليه بقاله كام سنه

ضحكت الغلبانه ضحكه مريره

وقالت : وكان كليه ايه؟

قالت : تجاره يا عمري !

نظرت الغلبانه لامها نظره خليط من الشك والبلاهه والاستغراب والاستنكار وكل حاجه ممكنه

وقالت لها: نعم؟
تجاره؟

قالت لها : وماله يا عنيا ؟ ماهو ابوكي خريج تجاره

ايوه يا امي بس انتي مكنتيش دكتوره ! الموضوع مختلف

قالت لها : الراجل ميعبوش الا جيبه

وده عنده شقه وابوه جايب له عربيه وهيجهز الشقه بالشئ الفلاني

هتعوزي ايه أكتر من كده؟

هعوز بني ادم اتفاهم معاه يا امي

استحاله يا امي انتي مش بتشوفي طلبه تجاره عاملين ازاي

ما بالك بقي بخريج قعد 7 سنين فيها مش 4 بس

قالت لها : ده حكم اولي شوفيه الأول وإتكلمي معاه


خرجت الغلبانه تحمل صينيه الشربات والجاتوه والاطباق وكأنها سوبر مان ومطلوب منها متتهزش في الكعب الخمسين سنتي اللي لابساه وتحافظ علي إبتسامتها كمان

نظر اليها حماده نظره طويله عريضه وتخيل الجاتوه رزم من البنك نوت مرصوصه امامها وتخيلها ترتدي فستان لونه أخضر تباركا بالدولار الامريكاني ربنا يجعلنا من بركاته

نظرت اليه فوجدت شاب عادي منظره كويس مقبول زي اي شاب بيلمع طبعا ولابس اللي ع الحبل وبيضحك ضحكه بلهاء

جلست الغلبانه وهو مازال متعلقا بها محاولا ان يعد البنكنوت الذي يتخيل ولما فشل ضحك ضحكه طويله اخفاها ف كحه عريضه

وقال لها

احمم احمم وانتي بقي يا انسه ايه هواياتك؟

ردت : ابدا شويه قرايه كده بحب الروايات ممكن وتصفح الانترنت واحيانا ,,,,

انترنت؟؟؟؟

نظرت اليه بإستغراب
أه إنترنت

قالها

لا لا لا لا إنترنت ايه بس ,, عيب كده يا أنسه ناقص كمان تقولي لي انك مشتركه ف الفيس بوك وبتدخلي اليو تيوب

ضحكت ضحكه استهزاء

وقالت له اه عادي وفيها ايه؟

قالها
هو ايه اللي فيها ايه
دول مليانين بلاوي يا انسه وانتي دكتوره وعارفه مش معقول ابدا

قالت له
والله كل واحد واللي داخل يدور عليه بقي

نظر اليها وقد كبسته بالكلام كبسه سوده

طبعا ماهي معلوماته عن النت معروفه ومعروف برضه بيعمل بيه ايه !!

زي أغلب الشباب بيحافظ علي اخته ويقولها مفيش نت عشان عارف انه بيغلط

دارت الخواطر دي فـ دماغها كويس

وقالها : وايه بقي رواياتك اللي قريتيها؟

قالت له : عادي اي حاجه يعني المهم تبقي القصه مكتوبه كويس

نظر إاليها بخبث وقال لها

وناويه تشتغلي؟

قالت له : أكيد إن شاء الله اومال كنت بتعلم ليه؟

قالها

جميل جميل انا بشجع عمل المرأه جدا انا اصلا كنت بناضل لده ف الكليه وبنظم لهم مظاهرات وكده

اومال انا نزلت 3 سنين ليه مهو من كتر اهتمامي بقضيه المجتمع عن نفسي

ياه تريخي مشرف ف المجال ده

ضحكت الغلبانه ضحكه عاليه استوجبت الاعتذار بعدها

ووشه جاب الوان

فقستك يا خفيف اومال يعني بتضحك ليه ؟

مر الباقي من اللقاء بسلام وتحدث عن امكانياته الماديه

وقال : انا عايزها بشنطه هدومها

اومال هو كل حاجه علي الراجل اصلا لكن البنت تجيب لو هو مش هيقدر يجهز لوحده

بانت الحكايه كأنها بيعه وشروه

وطبعا اشتري الفرخه اللي هتبيض لك دهب

جلست البنت تتذكر حازم اللي قرر يسافر عشان يكون نفسه ويرجع لها راجل
وانها حلها من كل الوعود بعد ما عرف ان استمرارها معاه صعب
وازاي فيه فرق ما بين ده وده

هو أصلا مفيش حاجه مشتركه

والفرق الواسع اللي يفرق عند أهلها فلوس التاني

مش موافقه يا ماما

ليه يا بنتي ربنا يهديكي

يا ماما ده معتوه ومتخلف وفشار وكذاب وشكله كده داخل علي طمع
ده غلط فـ إسمي اكتر من مره

طمع مين بس ده هياخدك بشنطه هدومك

ماهو بيقدم السبت عشان ياخد باقي الاسبوع

بلاش كلام فارغ مش احسن من الخايب اللي سابك وهج

متقوليش عليه خايب

لو كان خايب كان خطبني كان هيظلمني معاه قالي أستني وانتم رفضتم يبقي مش خايب
يبقي راجل محترم

بلا وكسه إحترام ميأكلش عيش

ماهو لو ع العيش هناكله بس انتوا عايزين لحمه

الراجل ميعيبوش الا جيبه

جيبه اللي هو يعمله لنفسه مش جيب أبوه يا أمي

وهنا تدخلت طنط تاكو وميمي وجيجي وكوتا وفتحيه

_بقي عندك 25 سنه
_يا بنتي دي فرصه متتعوضش
_الحب بييجي بعد الجواز
_ايه يعني تجاره , المهم الأخلاق وهو ميتعيبش
_دي شقته قصر هيخليكي ملكه
_هتقضي شهر عسل في بلاد برا

وايه يعني برا ولا جوا المهم اللي هقضيه معاه

وماله ميتعيبش من ناحيه الوسامه وسيم

وسيم بس اهيل ومش راكز ومش تعبان في حاجه

هو انتي غاويه فقر ايه يا بنتي صرفناا عليكي دم قلبنا ف العلام عشان اما تيجي جوازه تريحنا ترفضيها
ليه يا بنتي
آه آه آه قلبي

علي طريقه العيال كبرت

وتربس دماغ ابوها

يا تجوزيه يا يمين بالله لا هو ولاا غيره وهقعدك جنبي

وتتظاهر طنط فتحيه بإنها بتهدي النفوس

هتعنسي يا بنتي

متعرفيش مرار الوحده أهلك مش هيعيشوا لك

آآآآآآآآآآه ياني

خلاص هتجوزه

هتجوزه

ووافقت الغلبانه ودخلت الفخ

وشهر العسل أصبح أسبوع عسل
والشقه كبيره بس العفش مجاش لسه بيجهز

والراجل

كائن عايشه معاه طول النهار قدام البلاي استيشن لوحده

تفكر مانا بعرف ألعب ليه مش بيطلب مني ألعب معاه؟

ويستمر يغلط فـ إسمها حتي بعد الجواز

حتي ييجي اليوم

اللي يقولها: هنعمل مشروع

مشروع ايه؟؟

ابوكي كان عاين لك محلين تحت بيتك هتعمليهم صيدليه ده غير المحل اللي ف العاشر هو كمان

واهو خلص تجهيزهم

انا اللي همسكهم لك

طب وانت تفهم فـ كده؟

انا خريج تجاره

أيوه يعني بس انت محتاج دكتور هتنزلني في انهي واحده فيهم؟

ولا واحده

نعم؟

ايه انظرشتي!!

ولا واحده انتي هتقعدي ف البيت وانا هشتغل فيهم

طيب يعني ازاي؟ احنا متفقين اني هشتغل؟

يا ستي انا عيل ورجعت ف كلامي

عيل ؟ عيل ازاي؟ الراجل اللي بجد بيتربط من كلمته يا فندم
اوكي انت عيل انا اعيل ومش هسمح لك بالاداره دي وهما أصلا بإسمي

يثور عليها زي الطور ويرنها علقه يكسر لها فيها دراعها اليمين

ويبصمها علي ورق ملكيه الصيدليه وادارته ليهم الاتنين

وتستمر الحياه المقرفه ما بين مصلحته وسعادته

هو واخد كل حاجه

وهي مجرد شئ مستغل ملوش قيمه

يعني إتعلمت عشان ييجي واحد ياخد إسمها علي صيدليه يكسب منها

سبوبه مش جوازه !!!

ربما يتطور الحوار ويطلقها بعد سنه ولا اتنين بعد ما ياخد كل حاجه بعلقه ولا اتنين

ويمكن يفضل الموضوع استغلال متغطي يعني بدافع الحب عمال يسحب منها ويقتل فيها

لحد ما تفوق تلاقيه خالع

,,

المشكله مش في جواز الصالونات

المشكله في كلمه الراجل ميعيبوش الا جيبه

يعني لو أهبل ومعاه فلوس يبقي زي الفل ووافقي وفرصه ولقيه

مع ان ده بيخالف حديث الرسول اصلا ومش صح

مجتمعنا بقي عايز وقفه بجد

:)