:: أي كلام فاضي معقول ::

معنتش بقدر اواجه نفسي وانا حزينه في المرايه

ولا علي الورق

بكره وشي وهو باكي

إحساس صعب أوي...

اما تحس إنك مطلوب منك انك تبقي سوبر مان وخارق

وانت ايدك مكسوره ورجلك مكسوره

ولما غيرك يغلط تتحاسب إنت

إحساس صعب أوي ...

اما ترجع من بره

غرقان في همك

نفسك تلاقي حد ترمي كل ده عليه

نفسك بس في حضن حنين تعيط عليه وخلاص

حضن أم

ومتلاقيش

إحساس صعب أوي...

اما تحس أن الدنيا لفت بيك كفايه

وإنك هتقع

وتدور علي حد تتسند عليه

بدل ما تلاقي حد يسندك

يزقك

او تاخدها من قاصرها وتسند علي حيطه مايله

أو تقع والسلام

إحساس بشع اما تفوق من كابوس بالليل

تتمني حد يفتح باب اوضتك يقولك

"إسم الله عليكي يا بنتي

استعيذي بالله من الشيطان الرجيم

استهدي بالله ونامي"

ومتلاقيش

اما تفتحي عينك من الكابوس علي الضلمه

وتنامي وانتي لسه مخضوضه

مستنيه ربنا يبعت اللي يطيب خاطرك

فـ الحلم برضه

وإحساس بشع أما بعد كل ده

يلوموكي لأنك إشتكيتي

وتطلعي إنتي تافهه ومش حاسه بحاجه

ومش مقدره الظروف


الصمت... "حرام متسكتيش"
الكلام الكتير... "قله أدب أسكتي شويه"
وأما نتكلم شويه ... "إخرسي موجهتش ليكي كلام"

الضحك... "مياعه"
الحزن... "كئيبه ونكديه"
الابتسامه... "سخريه"



"انا ماليش كيف ولا مزاج لده

وملعون ابو كيفك انتي ومزاجك انتي ورغبتك انتي"