:: مركب ورق.!::

ساعات كتير أوي بنكون مضطرين ننتنازل عن حاجات بنحبها مرغمين ....
مش بمزاجي .!
عشان لو كان بمزاجي عمري ما هسيب حاجه بحبها
بس ظروف وحاجات كتير اوي بتبعدنا عن حاجات حبينها ولسه بنحبها
يمكن اما تعدي فتره كبيره وانتي بتتنازلي بتتنازلي غصب عنك اوي..!
وتسيبي الحاجه وعينك فيها زي ما بيقولوا .!
تيجي بعد كده للحاجات التانيه اللي بتحبيها تلاقيها معدتش فارقه عندك كتير
بقي كله محصل بعضه
ادام كده كده هنتنازل
تلاقي جواكي حاجه ترفض انك تتعلقي بحاجه جديده وتحبيها عشان متتنازليش عنها
عشان انتي فاكره كويس الوجع..!
وفاكره التعب..!
وفاكره انك فضلتي كتير تحلمي انها ممكن ترجع تاني
وتكتفي بانك تعيشي كل اللي تحبيه في الحلم
والحقيقه تخليها بس للمرار

يمكن يكون ده استسلام
يمكن يكون ضعف
اكيد هو جبن..!

بس يبقي ايه اما تيجي فـ وقت من الاوقات ترتبطي بحاجه تانيه.؟
يمكن الامل انها ممكن تستني ضعيف اوي..!
أضعف من حاجات كتير ضحيتي بيها قبل كده
بس تلاقي نفسك زهقتي من كتر التنازل
من كتر التضحيه
تفكري انك كان ممكن تعملي مجهود شويه وحاجات كتير متضعش
بس انتي كنتي ضعيفه اوي
استسلمتي بسرعه
ورغم ان دي حاجه صعبه حاجه بعيده
حاجه املها بعيد بعيد اوي
لكن انتي مسكتي فيها
بمزاجك

رفضتي انك تسيبيها حتي لو هي قررت انها تسيب الدنيا بما فيها انتي..
مع انها مش بتاعتك لسه
بس انتي خلاص خليتيها بتاعتك
قررتي متتنازليش عنها
بقت في حياتك حاجه كبيره
رغم انها باينه للناس عاديه ومجرد لحظات بتمر
مش عارفه
انتي بتعملي ايه ولا ليه.؟؟

ورغم انك مش قادره تتنازلي ورافضه تضحي بيها
ورغم انها مش ملكك
لكن انتي لسه مش فاهمه

رغم كل ده هي ايه قيمتها في حياتك؟

لكن تلاقي نفسك علي زعلها تزعلي
ولمجرد انها تبقي بس ادامك
ابتسامه تترسم علي وشك حتي لو بتعيطي..

بس الشعور ده يخوف
لأن الحاجه دي مش ملكك
وانتي لسه كفك مش قادر يطولها ولا حتي يقول انه عايزها
وانه مش هيقدر يضيفها علي قايمه التنازلات
لقيتي نفسك خلاص
دخلتي الدوامه دي
زي مركب ورق دخلت بمزاجها بحر كبير
وممكن الموج يبقي حنين عليها وتعدي
وممكن ميشلهاش ويغرقها
مش عارفه ايه ده
لكن انا قررت متنازلش عن حاجه بحبها
................


مش عارفه ايه اللي طلع الافكار دي ف دماغي حاليا

شكلها تخاريف الفسيولوجي :D

:: علمّك ::

يا وطني...

يا تاريخ يشهد

علي علمك وامجادك

وعلمّك...

ده عزيز يسرد

ماضي رسمه اولادك.!

ده احمر

يعني لون الدم

وبيه ضحوا سنين ياما

عشان ننسي ليالي السهد

ونبقي خير جند الارض

دي مش محتاجه لعلامه

والاسمر

يعني لون الهم

سواد الفرقه والاحزان

ووحدينا مع دموعنا

بنتلوي علي شموعنا

ونار النكسه تكسرنا

ودم شهيد يحررنا

بدمه بيرسم الالوان

والابيض

معني لونه سلام

وناس بالحب تتجمع

وغنوه حلوه بتسمّع

تقول الحلم ده عربي

وكل الشعب ده شعبي

وبكره بالامل لينا

ورسمه لمه بإيدينا

وفقنا نلقي حلم اللمه

كله كلام ...

ونسرك يا علم بلدي

ده سيد الدنيا والاكوان

وام الجافي والصافي

ف كل زمان

واكبر م اللي يسلاها

ف أي مكان

وكل اهانه يا بلدي

وهتعدي

وتبقي انتي يا صبيه

جميلتنا

وشعبك وسط كل الدنيا

ده الانسان.!

:: أحلم لي .. أحلم لك ::

علي قدي احلم لي

علي قدي احلم لك

دايما بشوف وياك

أحلامي ورسم لك.!

ارسم طريق مليان

بالحب والفرحه

أرمي علي النسيان

ايامي لو جارحه

أرسم ملامحنا

مكسيه بالضحكه

متشبكه ايدينا

ولأخر السكه

ارسم علي الجنبين

ف جناين الاشواق

وأقسمها علي قلبين

ميهزهمش فراق

أصرخ واقول الله

ع الدنيا وانا جنبك

وادعيله وانا ساجده

متشالش من قلبك

واتمني لو اخد

م العمر واديلك

وفـ كل صبح اقوم

م الفجر ادعيلك

يفضل هواك سندي

ف الفرح أرسم لك

أحلم لي علي قدي

وعلي قدي أحلم لك

الجاموسه الجاموسه يا عيني ع الجاموسه يا عيني آآآه

يونس شلبي في العيال كبرت
كان بيغني لأبوه
أغنيه

طلعت يا محلا نورها
شمس الشموسه
ياللي بيها نملاها ونحلب
لبن الجاموسه

ويا عيني ع الجاموسه

مهي اي كارثه في بلدنا

بيعملها اليومين دول واحد مختل عقليا
او جاموسه :D

انا والله مصدومه وفجعت من اللي قريته واتحكالي واللي شوفته

قطر ركاب خبط جاموسه بتعدي القضيب غلط
الله يرحمها
قوم ايه
ييجي قطر اكسبريس
اللي هو سريع يعني :D

يخبط قطر الركاب من ورا

وتطلع الجاموسه هي السبب

فعلا يعيني ع الجاموسه

هو ده نص اللي قريته

:: سبب تصادم القطارين جاموسه ضخمه اصتدمت في القطار الاول وادت الي تعطل العربه الاولي ثم جاء القطار الثاني ليصدم مؤخره القطار الاول ::

ولا حول ولا قوه الا بالله

اولا كده

هي الجاموسه دي ضخمه اد ايه يعني؟؟؟
فيل ولا ماموث؟؟

ثانيا

هو مش المفروض ان خط سير القطارات معروف ؟
والمفروض ان اما عربيه من القطر تتعطل بيبلغوا؟
ومش المفروض ان الاكسبريس ده معروف انه ماشي علي نفس الشريط؟
ومش المفروض ان حد يبلغه؟
ان في حادثه حصلت
وانه هيتعطل اد كده
او هيغير خط سيره
؟؟؟
ومش المفروض ان المده من طلوع قطر ركاب بطــــــــــــــــــــــــــــئ لقطر سريع زي ده تكون كافيه؟؟
ولا هي كانت عشر دقايق بحيث انها لو فرخه مش جاموسه يخبطوا برضه؟

مش ده اللي المفروض يحصل؟

انا نفسي افهم
هو احنا امتي هتبقي ارواح الناس عندنا ليها تمن؟

انا مش بقول الحكومه غلطانه
علي عيني وراسي

دي غلطات اهمال فرديه محدش بيفكر يعاقب الناس دي بصوره تردع غيرهم

وللأسف تعدي مشكله وتيجي غيرها والوزير يستقيل والريس يقبل
وكان الله بالسر عليم

هو يعني استقالته دي تعتبر عقاب؟
والناس اللي راحت؟

والموظفين المسئولين؟

طبعا كلهم هيتخصم لهم كام يوم وتحقيق ومعرفش ايه
ومحامي شاطر يثبت ان الجاموسه هي السبب وان لازم نعاقب الجاموسه

ويا عيني ع الجاموسه
:)

::بص بكره ::

قالوا زمان الجبن ده صنعه
صنع الجبن لبن وحليب
ويا بخت اللي يولع شمعه
من نار سرقه او تهليب

انت حرامي بشر انسان
حقك لسه يا بيه محفوظ
صيدلي بشري او اسنان
فقري حتي ولو محظوظ

اسرق لقمه ونزل دمعه
فرج بيها كروب مسجون
ابني ف بيتك بص لبكره
بكره معانا اكيد مضمون

هلب تاني لحد ما تشبع
ماله حرام كان ولا حلال
اسرق كتر مهما هتسرق
مانتش واصل يوم لكمال

،،،،،،،،،

والحدق يفهم :D

مجرد أحلام :: الحلم التالت :: (( غزه والانتفاضه ))

لحد دلوقتي
رغم اني بطلت_ يأسا _اكتب للقضيه دي
اكتر شيء ممكن يبكيني في الدنيا
صوره طفل مقتول هناك
او أم أو عيله أي حاجه

مش مجرد دموع
ده ألم
مبعرفش انام كتير
بفكر ان الحل مش صعب للدرجه دي
وبفكر ان عشان ييجي حل في مصالح
والمصالح اهم من البشر اللي ملهمش تمن
فيتحرق البشر وخلينا ف المصالح :)

قريت مقوله هتلر في كتابه
انه ترك جزء من اليهود لم يعذبه ولم يحرقه عشان الناس بعد كده تعرف
هو ليه كان بيعمل كده
وفعلا هتلر معاه حق :)

أول علاقتي بالقضيه دي
برضه وانا في اعدادي ايام الانتفاضه
الوقت اللي اشتعلت فيه مصر مظاهرات وحصار وغضب
وكلام ابن عم حديث :)

كان بيصدر حرنال للأطفال اسمه صبيان وبنات
انا اتربيت عليه
علي القصص المصوره اللي بيرسمها فواز وبتنزل عن شارون وعن الانتفاضه
انا مشيت في مظاهره وانا في 3 اعدادي ضد اليهود مع المدرسه
وكتبت كتير عن القضيه وانا طفله
كنت مع أصحابي القدام
بعد المدرسه نرسم كاريكاتور ونكتب شعر وقصص
عن الانتفاضه ونهين الصهاينه وندعي عليهم
ايام محمد الدره
اليوم الصعب
كان المدرسين يدعوا علي اليهود الصبح
واحنا نكتب بالليل
وعملنا لوحات مصوره للدره واللي حصل له
وعلقناها
اللوحات دي اتقطعت
كانت أول مره نعرف فيها يعني إيه مصلحه
يعني ايه حاجه اي انسان يرفضها
وتقبلها المصالح
يعني ايه وطن يهان
واحنا بنغني بالليل ونعيش
عادي
مدام مصر بخير يبقي احنا بخير

لسه محتفظه بديواني
ههههههههههههههههههههههههههه
اه ديوان
عملت ديوان اسمه القدس
انا اللي كتبته وزينته بايدي
باللون الاخضر
والاحمر
والابيض
كان نفسي انشره للناس
اعرفهم ان احنا مش اطفال واننا بنحس وفاهمين
ومش محتاجين الكبار يداروا علينا لاننا صغيرين
لكن
الله يلعن الخوف
اللي خلا كل احلامنا تنبت في الضلمه
او ممكن نقول
تموت في الضلمه


اخر يوم كتبت فيه حاجه للقدس كنت ف اولي ثانوي
وخصتها وعرضتها علي اصحابي
وسمعتها لهم
وقفلت بدموع مننا كلنا
وقلت للكل مش هكتب تاني حاجه ليها
مش عشان هي مش مهمه
عشان الناس متستحقش تقراها
برضه مش عشان كلامي مهم ولا رائع
لا عشان الناس جبنا
ميستحقوش يحسوا ان فيه ناس مش جبنا
:)

اللحظه الفاصله في حياتي في الوقت ده
وانا ف تالته اعدادي
اتفقت مع هند _ نفس رفيقه الكفاح بتاعه اسكندريه :D _
اننا نسافر غزه
المره دي مكنتش خايفه من بابا
ولا من رد فعل حد
كان في دماغنا حاجه واحده
احنا هنا مش قادين نعمل حاجه
ويوم ما نعمل
صوتنا هيتخنق
جبنا خريطه لمصر
واتفقنا اننا هنتتسلل من خلال المعبر

وحضرنا الشنط فعلا وكان اليوم اللي هنتقابل فيه ونسافر العريش
وكتبنا جوابات لأهلنا وبعد ما حوشنا فلوس لمده شهرين بنحوش
والساعه اتنين بالليل
طلعت علي محطه الاتوبيس معاها
لقيت ابويا وابوها
وامي هناك

:D

الناس دي عرفوا منين ان احنا هنهرب معرفش
طبعا الحاله دي
مكنش ينفع فيها رد فعل سلبي او عنيف
عملوا مجلس عيله
وسكتوني
وكانت الحاجه المسموح بيها
اننا نكتب اللي نحبه وبس

وانتهي الحلم
او اتقتل

انا كان نفسي فعلا اسافر
ولحد النهارده بحلم
كنت بشوف طارق عبد الجابر واحقد عليه
واما كان يضرب وياخد علي دماغه احقد اكتر

واقول يا بختك يا عم
يا بخته فعلا

انا معرفش وقتها انا كنت ممكن اعمل ايه مع هند هناك
احنا كنا ممكن اوي نموت علي الحدود
ومنعديش
وكنا ممكن نتسجن هناك
بس لو كنا متنا انا كنت هفرح اوي

خرجت انا وهي من اتجربه دي
اكثر حقدا علي المصالح
واكثر تعبا علي القضيه

ويوم ما مات عرفات
كان يوم صعب علينا كلنا

شفت بعدها صوره ليه
حسستني ان محدش فينا عمل له حاجه
ولا البلد دي نفعته
واخرها اتقتل
وكل بيكتم
وساكت

الله يرحمك يا عرفات
ولك الله يا غزه

:)

مجرد أحلام ::الحلم التاني :: (( إسكندريــــــــــــــــــــــه))

االبلد دي رغم ان المرات اللي رحت ليها كانت قليله جدا بس
انا بحبها قبل ما اشوفها
ومين مش بيحب اسكندريه؟
افتكرمفيش

اول مره رحت فيها اسكندريه كنت في تانيه اعدادي
في رحله مدرسه مع اصحابي كنت راحه متجننه بيها
ورجعت اكثر جنانا :D
اليوم ده كان يوم افتتاح مكتبه اسكندريه
منسهوش عمري
...........


اللي حصل اليوم ده زي اي رحله مدرسه
القلعه
قصر راس التين
البحر
الملاهي
الاتوبيس
البيت
بس ولا حاجه من دول امتعتني بالشكل اللي امتعت بيه الناس
انا فاكره اول ما الاتوبيس دخل كوبري استانلي
طلعت دماغي من الشباك وقعدت اضحك قوي
وانا مبسوطه كأني عمري ما شفت بحر ولا ركبت اتوبيس :D
بس اسكندريه بالنسبه لي حاجه تانيه
واحنا راجعين بالليل كنت بعيط اني هروح وفكرت اهرب منهم واروح لخالو يخبيني عنده ومرجعش تاني البيت
:D بس كنت ناسيه العنوان :D

واما روحت البيت ولحد النهارده رحت اسكندريه حوالي 5 او 6 مرات بس
كل مره بقتنع ان انا مش هعيش الا هناك
مش هكمل حياتي في بلدنا
رغم اني بحبها ولا القاهره انا عايزه اعيش في اسكندريه
فاكره كويس انا وهند صاحبه عمري مره طقت في دماغنا نسافر
هناك نقضي اجازه نص السنه واحنا في 3 اعدادي :D
قلت لها وهنقعد فين قالت ناخد الخيمه ونفردها علي الشط :D
في الوقت ده احلامي عمرها ما تعدت حيز التنفيذ
يعني اتجنن ف الحلم بس مش أكتر من كده
مقدرش أنفذ كنت بخاف من رد فعل بابا :D
قريب كنت مع السيد اخويا في طنطا عادي يوم عادي
قالي يلا نروح اسكندريه نشم هوا ونرجع
:D قلت له يلا وماله رحنا وجينا :D

اكتشفت في السكه ان الحاجه الوحيده اللي ممكن تجنني
هي البلد دي اسكندريه مش هعيش الا هناك :D

اي حاجه فيها اسكندريه بحبها ومعرفش ليه ومش عشان البحر مانا بروح جمصه والسخنه وراس البر والسخنه بحرها تحفه بس الا اسكندريه
كنت بحب مسلسل ضمير ابله حكمت
بحب حياتها
كان نفسي ابقي زييها
رغم اانها تعبت كتير

بس كان قدامها منظر البحر جنـــــــــــــــــــــــــــــــــــــه يا بختها بيه

وبس كده :D

:: أحلف.!::

انا احلف
بكون الحزن موتني
وكسر فيا احلامي
وفوت عندي أيامي
وفتفتني
ولملمني
ده لمم فيا صحاني
عشان علي غله ده
يحدف

انا ادمع
يبكي الحبر علي دمعي
بلون الدم يتلوي
و غير الحزن مين يسمع
وينجدني
يهدهدني
يحاول بيا يتقوي
يحاول لو يلمم فيا
او يجمع

دي نبته وسط نار الغل
واتغرست
بيرووها بنار الدمع
منها الهم اهو هيمل
وهي هي أهي ثابته
لا عم تشكي ولا بتكل
ف مرارها وحبه حزن
واتهرست


في كدب وغل و بتكبر
صوت مكتوم يواسيها
وليه تصبر
اذا تيأس ما بإيديها
موتها مش بخاطرها
حتي الصبر ده غالي
وولي من زمن سافر
وما بيظهر

يموت القلب
واجيب غيره يا خلق منين
رويت احلامه عندي سنين
مشيت وياه و علي صوته
بطول الدرب
غطايا الحب
ودفايا
قلوب عاشقين
و عمر عشت فيه و بغرق
بحزن ضنين

مجرد أحلام .. :: الحلم الأول:: ((أخويا الكبير))

في ناس اما بتيجي تكتب عن نفسها بتتمني ان في يوم تتلم مذكراتها في كتاب لكن انا مش بتكلم عن نفسي ولا بتمني يتحطوا في كتاب انا بدي فرصه للناس اللي دايما بتظلمني انهم يعرفوني كويس انا بتكلم عن حاجات بكلم فيها نفسي وانا بنام وانا ببص ف المرايه

فاكره انا من زمان كنت دايما احلم يكون ليا اخ كبير بس اما كبرت عرفت ان فيه احلام معقوله تتحق وفي احلام تفضل احلام زي حلم اللي اهله ماتوا
انه يرجع له اب وام تانين

اليومين دول انا بقوم وانام واصحي واعمل حياتي علي الاخ الكبير او التوأم أي حاجه ... معرفش ايه سر الحاجه الطفوليه انه ييجي دلوقتي ومعرفش انا محتاجاه في ايه محتاجاه وخلاص كل البنات ف الوقت ده من حياتهم بيحلموا بزوج او حبيب انا بحلم بأخ ومش عايزه اكتر من كده

قريت مره حكايه بعتها فتي يتيم لعبد الوهاب مطاوع
ميعرفش مين ابوه وامه
وطول عمره لوحده ومعتمد علي روحه
واما وصل لسن 22 سنه
ابتدي يحلم بام
تصحيه من النوم
تشربه اللبن
تزعقله
تدعي له
تضربه
تعلي صوتها عليه
نفسه في أم

كان بيقول ان طو عمره نفسه يجرب قيود الاهل اللي بيحكي عنها زملائه
واته حاسس انها احلي حاجه ف الدنيا
وكتب يطلب منه أم
مش عايز منها اكتر من الرعايه
الاحساس
انه ينده عليها ماما وخلاص

انا حاسه بده عايزه أخ محتاجاه ....

كانت ليا واحده زميله ليا تقولي اما تدخلي كليه تتعاملي مع زملاء تحترمي منهم ناس هتلاقي أخ وفعلا في اكتر من حد بعتبره أخ بس مش الاخ اللي انا عايزاه مهما كان طريقه الكلام مش هتوصل لأخ واخته ده حوار تاني

كنت بعيط اما بنت عمي تزعق مع اخوها وتزعل منه
واقولها ده مهما كان نعمه كبيره اوي غيرك نفسه فيها بشكل بشع

مش عارفه حاسه انه هييجي عليا يوم اكتب اعلان بحث عن أخ

:D

بقول لامي من كام يوم
هو انا فعلا مليش اخ اكبر مني
:D
افتكري يمكن يكون مسافر
:D
وصفتلها شكله وطريقه كلامه معايا
اها انا بكلمه

اما بحلم بيه بكلمه بس ده ف الحلم مش واقع

ببيع حلمي..

ببيع حلمي...


ببيع حلمي انا بالدم
وانا للحلم ابقي الام
ببيع قرب تعالي طل
تلقي خيال لهمك عم

ببيع احلامي جربها
ببيع اوهامي دوبها
ببيع الدمع ويا ألام
ببيع ذكري بهربها


ببيع الحب لو تقبل
ببيع حنيني ويا حنان
ببيع البسمه لو تدبل
ورسمتها ببيعها كمان

ببيع عمري باحلامه
ببيع فرحي بانغامه
ببيع ايامي والذكري
وعمري جديده ايامه

اخرسونا ..

اخرسونا..

الصوت دا طبع الحياة
وانتوا كمان اخرسونا
الصوت لو ضاع صداه
عيونا راح يفضحونا

اخرسونا

حاولوا بس يلا نشوف
السكوت مش طبعنا
السكوت ده أصله خوف
وخصاله مش أصلنا

خوفونا

الخوف يلا زيدوه
بسلاح موت كبروه
لو جه يخنق كلامكم
ساعتها إبقوا اقتلوه

اخرسونا

مّوتوا بروحنا الكلام
زودوا الخوف والملام
إقلبوا العابد شيطان
اخرس ما يجيد علام

موتونا

مّوتوا بقلبي الأمل
والأمل اهو مني مل
وخلاص سميته يأس
ما مات ومفيش عمل

اقتلونا

اقتلوا الروح والضمير
خلوا المركب تسير
بس لو قابلتها موجه
غرقانه وده المصير

الكلام بركان غضب
ساكت وطبعه الأدب
وف يوم ما هتكتموه
الكون دا راح ينقلب.
..

صوره واتهدت بعنف ...

صوره واتهدت بعنف ..
شجره كافور
بين الزهور
نسمه هوا
وإحنا سوا
الدنيا نور
الله عليك
وحشتني!!
باين عليك
بتحبني؟!!
والله عارفه
وجاي بلهفة
بتضمني؟!!
سمعني صوتك
وريني ضحكك
حسسني لمسك
شوقك وهمسك
طمني بيك
وريني فيك
يومي وأمسي
حسسني انك
بتحبني؟!!
بتحسني..

ده كان مجرد وهم أو يمكن خيال
لان وجوده جنبي بجد من المحال
يكون في يوم شيء من صواب
ممكن يقرب انه بس يكون سراب

وهم وأكيد
صدقته أنا!!

قلبي وحيد
قلبك حجر
قلبه سعيد
قلبي انكسر
حلمي بعيد
حلمه انتصر

إحساس رهيب
وهم وغريب
حلمي اتخطف

ليه سبتني؟!
ضيعتني؟!
بتحبني؟؟!
كداب كبير!!
كداب أوي
كدبك خطير!!
قلبك قوي

القلب رسمك في خياله
قبل ما يشوفك بعنيه
والله كان عالم بحاله
والحب كان عنده ايه

الصورة جوايا اتحفرت
أجمل كتير من أي حد
وفي يوم كانت اتكسرت
وبينك وبين القلب سد

صوره اتحفرت بنور
حبيتها حبيت رسمها
لكن كلامك كل زور
وكرهت حبي كرهتها
صحيت في يوم كسرتها
دمرتها
جوايا هديت صوره قديمه
كنت رسمتها

وحبي لك؟!!
مجرد حنين
مع السنين
أكيد حبيبي
يموت معاك
وهيتنسي
وهيتمحي
أصله سراب!
أخره معايا
هيتنسي..!!

::كلام ::

كلام.

كلام فارغ كلام مليان
كلام مخفي كلام بيبان
كلام ينفع كلام بيضر
كلمه بتبني روح إنسان

كلام ييجي كلام بيروح
كلام مقفول كلام مفتوح
كلام يطلع كلام يدخل
يزود فينا ياما جروح

في كلمه تقولها تمتلكك
في كلمه تقولها تنساها
نسيتها أكيد هتفتكرك
تروح دايماعلي هواها

كلمه بسيطة تكبر لك
تخلي الناس بتسهر لك
بموت أو هم عم تحلم
في شر هلاك تدبر لك

كلمه تروح لحد الشمس
تجيب في دفاها ترجع لك
وكلمه تشد فيك للأمس
تمّوت فيك تجيب أجلك

كلمه تشيل قيود الظلم
وكلمه بتمحي لون الدم
وكلمه تموت الإنسان
تصير تخرس بايده الفم

و كلمه تقول معاني الحق
وكلمه تقوم تنام بالصدق
كلمه تجيب لك الأحلام
كلمه بتوصل اللي انشق

كلام وبس دي حياتنا
و رد لفعل مش أفعال
فاضل كلمه علي مماتنا
هتمحي كل شيء اتقال

يومين وذكريات 12 عام ...............

منذ اول وهله دخلت فيها البيت القديم في بلدتنا الريفيه

ذلك البيت الذي لم يعد يسكن فيه الا خالي وابنه

الذي هو اخي ورفيق طفولتي

كنت اشعر برتابه المكان وانني لست بحاجه لاضافه العديد من الذكريات المريره الي ذاكرتي

فيكفي ما فيها الان من حزن والم

لم اكن اريد الذهاب وعارضت حتي اخر قدرتي

ولكن ابي اصر علي ان اصاحب اخوتي وبنات خالي الاخر الي هناك


***

ومنذ ان دخلت العربه البلده

استعدت ذكريات المكان كافه

وحتي من قبل الدخول

الطريق

تذكرت اياما كنا نذهب فيها علي هذا الفرع النيلي المسمي بالعباسي

الهواء البارد كان يصطدم بجبيني بقوه

ويشعل ذاكرتي

اذكر حين كنا نذهب دفعه واحده من الاطفال

ليس منهم الا ثلاثه تقريبا متقاربين في العمر

في سياره ميكرو باص وقتها كنا نأجر هذه تكفي العائله كلها

وطوال الطريق ضحك ولعب

اذكر جلوسي مع اخي في اخر العربه لنلعب بنك الحظ والكوتشينه والدومينو

والتفكير في حلقه كارتون المساء وماذا سوف يحدث فيها

ونفكر في الكلب الذي تركناه وحيدا في العام الماضي ولا احد يرعاه غيرنا

وربما اخذتنا الاحلام لنتمني وجود حاسوب نعب عليه العابنا المفضله وقتها

***

ومر طريق فرع النيل هذا ومرت معه السياره

ودخلنا البلده

وتذكرت

هذا الطريق

كنا عندما تصل السياره

ينزل جميع الاطفال ومعهم جدتي

لنمشي حتي بيتنا

ونمر علي الحقول المزروعه المملوكه لاهل البلده الصغيره

ونتبادل النكات

وتحكي لنا جدتي عن انواع هدذ المحاصيل

وتحكي لنا ذكريات طفولتها هنا

ويسلم علينا كل من يمر

كنا نعرف اهل البلده كلهم فرد فرد

***

اما اليوم .!!

فأين ذهب كل هذا

اذكر ان اخر مره ذهبت فيها الي هناك منذ حوالي 6 سنوات

من نفس العمر الذي حرمتني فيه الظروف من اخي وقتها

ادركت ان الذكريات سوف تصيبني بالحزن من جديد

وتمنيت لو ارجع مره اخري

بلا الم
هكذا كما جئت.!!

ولكن لم يحدث هذا

***

دخلت المنزل كما هو كما تركته

باستثناء بعض الاشياء التي تغيرت بعمر الزمن وبعض الاضافات الجديده

وسمعت صوت موتور المياه الرتيب يوشك بملل كثير

تك تك تك

دخلت البيت ووقفت لألمح في جانب المكان تلك الكنبه القديمه الاسطنبولي

وكانت ذكري اخري

اول طياره صنعتها في حياتي كانت هنا عليها

اتذكر مكان الاشياء كأنها مازلت موجوده ويرن صوت ضحكاتنا في اذني كأننا لم نغيب

وصوت جدتي تنادينا للعشاء مازلت اذكره كاملا

صنعناها من الحطب وورق الجرائد والورق الملون

صنعناها في المساء بعد اذان المغرب وطيرناها في الصباح التالي من حديقه المنزل الواسعه

تذكرت يوم ان طيرناها جيدا

نجري نضحك لا نخاف لا نقلق لا يؤرقنا خوف علي مال ولا عمر

مضت السنون وتبدد كل هذا دفعه واحده

تبددت هذه الضحكه الصافيه وتفرق الرفاق الصغار كل في طريقه

حتي احلامنا المشتركه دمرت

توقعت انني سوف ابكي اذا نظرت الي الحديقه تجنبتها ومررت


***

لاجد خالي وولده في وجهي

ذلك الاخ الرفيق

لم اتبينه

غيرته السنون كثيرا اصبح شابا يافعا يزيدني في الطول وكنت قد تركته قصيرا جدا واقصر مني

ولمحت نفس النظره للمكان كأنه يستكشفه لاول مره كما فعلت

تمالكت نفسي وصافحت اخي

اخي الذي حرمت منه سنينا طويله لاسباب لا تهمني

ولا اريد ان اعرفها


***

ووجدت جدتي في اخر الحجره جالسه جلستها القديمه وتناديني

مشمش تعالي بصي عملت لك ايه انت والولا ده

ضحكت لاول مره منذ دخولي المكان وتذكرت اقوالها القديمه وقصصها

تذكرت يوم ان جهزنا هذا المنزل وجددناه كنا جميعا نشارك

وجلس الصغار بعد الترتيب والتجهيز يقسمون الحجرات عليهم

وجدتي تضحك

ثم جائت وقسمت لك ود من اولادها حجره له ولزوجته

وللبنات الصغار حجره

وللاولاد حجره

وحجره المعيشه وحجره جدتي وحجره الاستقبال يسمونها مندره

ذهبت وقبلتها وجلست الي جوارها اتأمل المكان ولكن الرفقاء لم يمهلوني لحظه

وجدت الجميع حولي سعيدا بتجمعنا

وخجلت من حزني

وقلت لنفسي نحن من نصنع الذكريات

فلنصنع غيرها وما المانع؟؟

***

قمت الي حجرتي ارتب اشيائي ثم عدت اليهم

وجدت الجميع مصطفين امام الكمبيوتر يختارون فيلما نشاهده

اقترحنا فيلما تاريخيا وجلسنا نشاهد صامتين

ولكن روح الدعابه القديم يكاد يختنق ويريد ان يعبر عن نفسه

لم نتمالك انفسنا وضحكنا من لاشيء ثم تأملنا الفيلم

وتبادلنا النكات عليه

وقلبناها مسخره بقي :D

وجدت جدتي تقولي والله زمان يا ولاد

رددنا ورائها ككورال

والله زمان ............ زمان والله

واستمر الضحك حتي موعد الغذاء


***

ويالها من جلسه

نفس الطبليه القديمه تذكر ذلك اليوم الذي اجتمعنا فيه عليها بعد اللعب وانتهي الصغار من الطعام

وخرجنا ومعنا المفرقعات والبقيه لم ينتهوا بعد واخذنا نشعل ونرمي عليهم المفرقعات من الشرفه من خارج المنزل

كان يوم لا ينسي

وكذلك علقه لا تنسي :$

***

انتهينا من الطعام لتبدألأ جلسه اللعب القديمه المعتاده

كل فرقه تختار لعبه وتلعب

الدومينو وبنك الحظ والطاوله والكوتشينه

غلبت اخي بنصر ايوبي هائل

في الدومينو 95

ولعبنا دورا علي تحضير العشاء :D

وكان هذا من نصيبي انا وحضرت لهم عشاء

حرموا من بعده طلب شيء كهذا مني :D


***

وانتهي اليوم الاول علي السهره المعتاده

والنوم علي الكنب من التعب والارهاق ليوقظنا خالي بالماء المثلج والثلج

ويصرخ فينا

كله علي سريره هعد لحد خمسه واللي هيفضل هنا هيتقطع :D

وتصنعنا خوف الاطفال وهرولنا علي حجراتنا

كأن السنون لم تمر شتان ما بين حالي عند الدخول وبعد الجلوس والاندماج

سعيده بهذا واخشي علي انتهائه

كانت هذه خواطري قبل نومي في هذا اليوم

اخشي النهايه فقط

وادعو الله ان نستمر هكذا

***

جاء اليوم التالي وكالعاده مر علينا حماده الصغير يصحينا من 8 الصبح عشان --جعان بقي وعايز يفطر :D

-يا ابني احنا نايمين الساعه 6

مليش دعوه اكلوني وناموا --

فقررنا ان نأخذ اليوم من اوله لان في اخره هناك فرح

***

وقمت غسلت وجهي ونظرت من الشرفه لاري الحديقه لأول مره

نفس شجر الجزورين في جوانبها

ذلك الشجر الذي كنا نجمع ثماره لنزين بها اعمالنا الفنيه

ولكن تذكرت اليوم الذي دخل في اقدامنا واصابها

فهو حاد جدا كما اتذكر

ونظرت لأجد الكلب الامين وقد اصبح له عزوه من لاولاد وضحكت

تذكرت اليوم الذي كان صغيرا لايزال مولودا

وجناه مكوما علسي نفسه وامه ماتت وهي تلده

واشفاقا عليه

دخلنا الي المطبخ واحضرنا اطباق وضعنا فيها اكل وماء ولبن وبعض الفطائر للكلب المسكين

وتذكرت ايضا النهايه التعيسه لهذا حين ضربنا خالوا وصرخ

كلب شوارع بتأكلوه في الاطباق اللي بناكل فيها :D

وطوال الليل نبكي من سوء معامله خالو للكلب

نظرت لاجد الرفقاء يتطلعون الي من اسفل

وينادون في نفس واحد انزلي يا حاجه :D

هنركب حمير

بصراحه

كنت هقع من البلكونه من الضحك

:D :D

***

تذكرت يوما كان هناك حصان او حمار لا اذكر ولكن يبدو انه حصان غير مروض

قالي لي اخي

_ده عثول ولونه حلو يلا اركبي وانا هزقه وهمشي جنبك

-- لا يا سيدي اركب ادامي

-متخافيش ده عثول وانا حنبك اهو

وركبت الحصان للأسف

وشده اخي من ذيله وركله
والحصان طار او اندفع

او انفجر لا اتذكر

سوي انني في النهايه تكومت علي رمل امام البيت واخويا يضحك علي اخره

وانا عايزه اضربه ومش قادره :D

***

نزلت اليهم ولعبنا كالعاده ودخلنا الحديقه

وذهب الرجال لصلاه الجمعه

اصبحوا فعلا رجال :D

الله اكبر :D

واكتمل شمل الرفاق بعد الصلاه واحسست انني لم اكمل عامي العاشر بعد

ذكريات لم اكن اتذكر انها سوف تجتمع عندي بمثل هذه السرعه

ولم اتوقع انني لن ابكر ولن احزن


***

وجاء الموعد المنتظر

الفرح :D

وذهبنا للفرح بربطه المعلم كده :D


نحن لم نقضي الا حوالي 15 دقيقه فقط

مروا وكل البشر ينظرون الينا في تعجب

ولسان حالهم يقول

مين العيال الطقه دي :D

ولانه كان فرح بلدي والعروسه قريبتنا

فالفرح من نوع حييوا معايا الاستاذ فلان وسمعني سلام مربع ومزيكا :D

جذبوا خالوا ليرقص التحطيب مع رجل

وهو يقسم بالله مبعرفش ارقص

والناس لا احد يصدق انه لا يعرف

وكانت النتيجه عصا في رأسه وكمادات واشياء اخري :D

عدنا للمنزل بعد الضحك علي الاستاذ المطرب

اشرف شريف

حبيب الملايين

عندهم كده زي عمرو دياب في القاهره

:D

وبيغني ماشاء الله

هذا المطرب بالذات كان محور الحديث طوال الفرح من هيئته وشكله

وطريقه غنائه ومسته للمايك :D

وياليل التي اذا نطقها نضحك ونسد اذاننا :D

وانتهي الفرح وانتهي اليومان

وانا لا اصدق انني يجب ان ارحل

لا اصدق انه علي الجميع الرحيل

وكل منا اخذ يحدث اباه عن البقاء اطول

ولكنهم رفضوا ووعدونا بتكرار اللقاء مره كل اسبوع هناك

واحنا بقي

ما صدقنا

في الاخر كده

اللهم لا تفرق احد
واجعل هناك دوما ميعاد

انا مبسوطه اوي
:D :D :D

مواصفات رجل حياتي :D :D

شايفه انا بقي شباب الجيل عمالين ينقوا ويحتاروا

ويحلموا وكل واحد عايز مش عارف ايه

قلت في ذات نفسي اشمعني انا

مهو اكيد رجل حياتي لازم يكون له شويه مواصفات برضه :D

عشان نبتدي نفكر جديا ف الموضوع بقي :D

انا بقي الحمد لله مش طماعه وهما بتاع ميه متين حاجه اساسيه كده :D

بحط العقده في المنشار


وهقسم المواصفات لقسمين شكلي ومعنوي :D


اولا الشكلي :D

1. لازم يكون اطول مني بس مش عمود يعني مبقاش عامله زي ميداليه المفاتيح جنبه
   

1. لازم يكون شكله مصري يعني مش واحد ملون ابيض وعنيه خضرا وشعره مش عارف ايه اتعاكس بيه في الشارع
   
2. الوسامه بقي علي قدر معين يعني شكله مقبول مش وحش ومش حلو وطبعا الحد المقبول يبتدي من احمد عز كده وانت طالع :D
3. لازم يكون لبسه شيك يعني مش واحد مبهدل بيلبس حاجات عجيبه والوان اعجب :D
   
4. يكون صوته حلو مش غليظ ويخوف انا مش ناقصه خضه كفايه الكليه :D
   
5. جنب اللبس الشيك لازم ولابد يكون من الناس اللي مش بتطول دقنها زي ما يكونوا كانوا في جبل دول ولو طولها يبقي المنظر العام
   مقبول برضه :D
6. يكون بيحب الالوان الجميله مش كئيب غاوي اسود بني كحلي رصاصي :D ماله الاحمر مهو لون زي الفل :D
7. لازم يكون وشه بشوش مش مكشر وزعلان وحالته كرب وعمال يغني ظلموه ظلموه :D

نيجي بقي للمعنوي وده المهم بقي :D

1. اولا حنون يعني يزعلني ماشي بس يصالحني مش يسيبني اخبط دماغي في الحيطه :D
2. ثانيا طيب بس مش لدرجه الهبل يعني يعني طيب برزانه كده :D
3. يكون راجل يعني راجل يعني مش لين كده من النوع اللي له هيبه ده تحس له باحترام كده وانت بتكلمه :D
   
4. يكون شهم ومستعد يساعد الناس مش كل حاجه وانا مالي وانا مالي :D
5. شخصيه اجتماعيه :D يعني مش يحبسني ف البيت ويقول ولا نزور حد ولا حد يجيلنا
   
6. يكون مسخره :D مش عيب اقصد يعني دمه خفيف جدااا ودي تعتبر الاهم عندي يعني ممكن يضحك الكراسي والكنب اما ينوي يهظر :D :D
7. بيصلي ويعرف ربنا ويراعيه فيا ويصون العشره يعني عنده خلفيه دينيه كويسه يشدني للجنه مش يحدفني علي جهنم والعياذ بالله
   
8. يكون مثقف الي حد كبير وواعي وبيحب الفن والادب مش ف الرايحه والجايه يتريق علي الادب والناس اللي بحب اقرا لهم مش هستحمل دي خالص :D
   
9. يكون رومانسي وحساس وذوق :D مش مدب ولا من الناس اللي الشغل والمسؤليه بتحولهم لمجرد كائن يعبي فلوس وكده :D
10. عنده استعداد اني اشتغل واعمل نفسي ويشجعني وهو كمان يكون ناجح في حياته مش شخص ملوش طموح :D
    
11. يحب ماما وبابا واصحابي عشان انا مش ناويه اقاطعهم هو يطول يلاقي حما زي ماما :D
12. يكون معتمد علي نفسه مش ابن امه :D
13. يكون بعيد عن المطبخ وميحاولش يفنن فيه ويبدع العمر مش بعزقه :D :D
    
14. بيحب يحلم لان انا نص حياتي بحلمها الاول قبل اما انفذ اي حاجه :D
15. يكون اب مثالي زي حسين رياض في افلام زمان يعني الطيبه علي اولاده والحنان معاهم والحزم يخليهم يحبوه جدا :D
    
16. بيحبني ويحسسني بده ومش يزعلني كتير يعني يخاف علي زعلي وبالتالي انا هخاف علي زعله وبالتالي مش هنزعل
    
17. اخيرا بقي لو في حد كده فعلا ربنا يجعل يومي قبل يومه (بحب الدعوه دي جدا )

بس كده الموضوع مش صعب خالص

:D دعواتكم بقي

:D

:D

OmNiA Sh

كنت بحلم

كنت بحلم...

علمني ليه معني الحياة؟ وسابني ليه؟
كان كل حلمي اكون معاه بعدني ليه؟


وياه حلمت إني اكون
ورده ضعيفة ف جنته
أو حتي زهره ف سكته
ما ف يوم تسيبه لوحدته
سابني حزينة في دربه ليه؟
صوتي وغنايا اصبح سكون


علمني ليه معني الحياة؟ وسابني ليه؟
كان كل حلمي اكون معاه بعدني ليه؟


يوم لما جاني وقالي خايف
خايف حبيبتي من الحنين
من أي همسه من الشفايف
أو قلب مليان بالأنين
طمنته يومها وقلت له
ازاي أنا انسي الحنين
من غير ما أحسه واحن له
ازاي اسيب حلم السنين
اللي حلمته ورحت له
ازاي أتوه قلبي تاني
بعد ما لقي بر الأمان
عي شط قلبك
بعد توهان السنين


علمني ليه معني الحياة؟ وسابني ليه؟
كان كل حلمي اكون معاه بعدني ليه؟


دلوقتي عادي بعتني؟
دمرت روح قلبي بجفا
ضيعت ليه منه الوفا
حبيبي ليه ضيعتني؟؟


وياريت في يوم سمعتني
هو الحنين سهل تلاقيه
عشان تسيبه تضيعه
ولا الحبيب عادي تجافيه
من غير دموع بتودعه


طب ليه كده؟
ليه قلبنا اصبح حجر
بالشكل ده؟
وليه بنوجع في البشر
عادي كده؟


علمني ليه معني الحياة؟ وسابني ليه؟
كان كل حلمي اكون معاه بعدني ليه؟


حنيني ليك خنقك أكيد
وبعادي عنك ريحك
مرتاح وأنا قلبي وحيد
هييجي قلب ويجرحك
وابقي افتكر انه زمان
كان فيه حبيب أتشد لك
حبك كتير وحن لك

وابقي افتكر عملت ايه؟
وضيعت حبه بس ليه؟
وانك معاه كنت الأمان
كنت الدفا ويا الحنان
كنت حلم كبير أوي
كان عنده اقرب من الوريد.

كلام ..

يمكن انا ترددت كتير قبل ما اكتب واقول الكلام اللي هقوله

خصوصا ان الناس مش ناقصه غم .!!!!!

بس بجد كان لازم اتكلم مع ناس كتير واسمع منهم

زمان واحنا اطفال صغيره في المدرسه علمونا الاساتذه ومش عارفه ادعي لهم ولا ادعي عليهم بصراحه .!!!

من منطلق انهم علمونا قيم ومباديء يستاهلوا اني ادعيلهم واوي كمان

ومن منطلق ان القيم والمباديء دي بقت مجرد براويز بتتعلق علي الحيطان نتباهي بيها وبس وان الكبار اللي بيعلمونا القيم

دي اول من يتجازوها ويعتبرها مجرد رفات للماضي .!!!!!!!!!!

زمان اما كنت اسمع من الاساتذه الكبار قيم ومباديء اما كان اي حد يكلمني عن الشرف والامانه

كنت بحس بالقدسيه والطهاره والجمال .!!

معاني جميله اوي مقدرش اوصفها

كانت بتملاني احساس بالمسؤليه .!!

دلوقتي اما بسمع الكلام ده بستعجب وبضحك اوي اوي .!!

مش مصدقه ولا قادره اربط ما بين القول والفعل

ولا حول ولا قوه الا بالله .!!

اتعلمنا ان فيه صح وفيه غلط ومفيش منطقه رماديه ما بين الابيض والاسود

وان الحلال بين والحرام بيّن .!!!!!!!!!!!!!

لكن كبرنا عشان نلاقي ان الغلط ممكن يبقي صح تبعا للظروف

وان الصح ممكن يبقي غلط علي حسب اللي بيقوله

ولقينا ناس بتخلق بين الحلال والحرام مناطق مايعه رماديه وكمان بيتبعوها .!!!!!!!!!!!!!

اتعلمنا ان اللي بيغلط بيتحاسب علي غلطه

ولقينا ان الواقع برضه علي حسب اللي بيغلط


يعني لو هو واحد كبير وانت صغير

الصغير له حق عند الكبير وظالمه

الكبير عارف انه غلطان وظالم .!!!

والصغير مؤمن انه مظلوم وحقه ضايع .!!!

والناس برضه عارفه ان فيه ظلم ومع ذلك كله ساكت ومستسلم للأمر الواقع .!!!!!!!!!

واما حد يجرب يفوق ويحب يتكلم هيقول ان فيه ظلم وفيه غلط .!!!!!

بيكون رد الكبير برضه انه مغلطش اما اتصرف كده ادام تصرف الصغير المتهور

يعني غلطه نتيجه غلطه اكبر من الصغير .!!!!!!!!!!!!

المؤسف ان كلنا هندور علي غلطه الصغير اللي معملهاش ونسيب الكبير ونسيب الظلم ونحقق في قضيه غلط في الوقت

الغير مناسب .!!!!!!!!!!!!

حديث السرقه للرسول عليه الصلاه والسلام قال علي حسب ما فاكره فيما معناه

انه اهللك الذين من قبلكم انهم كانوا اذا سرق فيهم الشريف تركوه واذا سرق فيهم الضعيف اقاموا عليه الحد

اهلكهم .!!!!!!!!!!!!!!!!

احنا اكيد في طريقنا للهلاك .!!!!

يعني انا بس بحاول افهم في نص السكه احنا فين بالضبط .؟؟؟

وايه اللي حاصل لينا

انا مصدومه اوي في كل حاجه بشوفها كل يوم بتأكد لي الصدمه دي مش بتنفيها .!!!!


اعذروني انا حاسه الموضوع عايم بس انا مقدرتش اوضح اكتر من كده ولا اكتب اكتر يعني كده كفايه

واسفه لو كنت هسبب لاي حد جو من التعب .

MshMsha