المهم ان انا فتحت المدونه عشان اكتب تدوينه وانا اساسا مش نايمه
بقالي فتره من الزمن
وعنيا بتحرقني جدا
ومعنديش حاجه اتكلم فيها في فقر ادبي ومعنوي نادرا اما يحصل ايام الامتحانات
فين ايام ما كنت ببدع في الشيتات وكده بقا
المهم جبت اللاب اهو وفتح تويتر واكتشفت اني بتزاول في الهامي
بس انا كمبدعه معنديش الكلام ده وهكتب يعني هكتب :D
فخلونا نتكلم بصراحه
وايه المانع نتكلم بصراحه
نتكلم بصراحه علي عده محاور ,
المحور الاول
من فتره اربع سنوات ويمكن اطول شويه , كان في موضوع منتهي ومش بس منتهي ده ميت
ومن كتر مانا كنت بصاله كنت متخيله اني مش هنتهي منه الا اما اموت
وبعد كده , من غير ما اعرف حصل ايه , نمت صحيت لقيت مفيش حاجه خلاص !
نسيت , ومش مهتمه , غير مباليه بمعني اصح
انا بحكي الحكايه المبهمه دي ليه ؟
عشان عاوزه اقول ان كتر البص علي باب بعد ما يتقفل حاجه مش مظبوطه , غلط , بتوقف حياتك ليه عند الباب ؟
وفي بدل الباب عشره اتفتح ؟!
وبتوقف حياتك عند الحزن ليه وفي الف طريقه تفرح بيهم ؟!
وبتستني ليه حاجات ميته وفي حاجات عايشه ؟!
الدتيا اصلها اختيارات , اختار !!
وانا مخترتش , انا فجأه لقيت نفسي بدي ضهري للباب
واكتشفت اني ضيعت كتير اوي وانا بصاله !!
المحور التاني
التخبط الشخصي
علي الصعيد المهني , حلوه الصعيد دي
انا كصيدلانيه خدت مدتي الرسميه في الكليه بلاس سنتين بونس عشان بيحبوني بما اني اصلا اتحب وكده
من سنتين قررت اني هشتغلل وقد كان ونزلت اشتغلت بعد ما الدنيا ظبطت في الدراسه وكنت ماشيه كويس
وابتديت احط لنفسي خطه جديده وابتديت فعلا انفذها
لحد ما تعثرت للمره التانيه
وانضربت خططي كلها
مفيش فارما دي ودي دبلومه عندنا في الكليه
العيله قررت انها تعملي صيدليه وفعلا تقريبا جهزت
بس انا مش عايزه اشغتل في صيدليه !
ومش عايزه يعني مش عايزه وده من زمان
بس المشكله اني برفض وانا مش عارفه هعمل ايه بعد كده ؟!
يعني انا بعاند لمجرد العند
لكن انا معنديش خطط بديله
معرفش !
هو اي بني ادم بعد اي صدمه او عثره بيبقي كده متخبط ؟ ولا انا بس بصبر نفسي ؟!
وهفضل كده كتير ولا ايه ؟!
محور كمان مش مشكله مش هيخسر
انا بلاحظ ان في ناس في حياتي بتتراجع مراكز عظيمه لورا
لورا لورا
في ناس كانت مركز اول نزلت اوي بدل المركز عشره
وفي ناس اختفت من غير سبب
وفي ناس عشان بتحبني مبتقربليش
ههههههههههههههههههههههههههههههههههههههه
يعني ايه ؟؟
يعني ايه عندي امتحانات ؟! فمش هسأل عليكي ؟! علي اساس انها شئ مستجد يعني ؟!
طب ما احنا طول عمرنا كده
ولو حصل وحد قصر بنعاتب بعض
بس انا ليه مش عايزه اعاتب ناس كتير ؟؟
وليه زعلانه منهم ؟؟
طب هو انا ليه لما بسأل عليهم بلاقي برود؟؟
ليه كلمه وحشتيني مبسمعهاش بنفس الحراره اللي بقولها بيها للناس اللي بجد بحبها ؟!
ليه بيكتفوا بإفتكرتك مشغوله؟
ليه صاحبتي اللي كانت بتقولي الصداقه خد وهات وليها تمن بقت فجأه تعتبرها خد بس؟!
وانا ليه لوحدي؟!
السنه دي كلها كنت لوحدي
اول شهرين في السنه دي كنت مقضياهم في اوضتي مبخرجش ومبشوفش حد
لحد ما اكتشفت ان محدش هيسأل فيا
وان انا اللي حالتي هتدمر , واني بغلط في حق نفسي
نزلت اشتغل
انا خجوله مبعرفش اروح مكان لوحدي مبعرفش اخرج لوحدي
بقيت بخرج لوحدي وبروح وباجي لوحدي كل حته
اكتشفت ان انا ممكن اصاحبني ونبقي جدعان مع بعض
نزلت صيدليه
كنت بخلص شغل وبخرج اشتري لنفسي شوكولاته كتير
ومره ولا مرتين جبتلي ورد
وكنت بشتريلي هدايا
والغريب اني كنت بضحك علي عبطي بصوت
بس كنت بنبسط بجد
يعني اهي ضحكه
المهم انها ضحكه
يمكن من بعد ما بقيت بحاول ابسطني مبقتش احب اعاتب حد ؟!
مانا محبش اكلم واحده بنبره صوت عاليه وسعاده طاغيه واقولها وحشـــــــــــــاني
ويكون ردها وانتي كمان :)
بتقفل
اذهبوا الي الجحيم ,
والطريقه دي بتخيب معايا كتير
بس بتفرحني شويه
شباك يعني في الزنزانه الضلمه يهوي عليك شويه :)
كفايه كده
انا مش عارفه اساسا ايه اللي كتبته ده ومش قادره اكمله :D