عارف يعني ايه بحبكـ بجد ؟
يعني أول حاجه تدخل قلبي بجد غصب عني
يعني حتي لوفات مليون سنه هفتكر انكـ أول حد حبيته بجد
يعني تبقي إنت في كفه وكل الناس في كفه تانيه والكفه التانيه دي مش موجوده اساسا
يعني اما قلبي يتقبض ادور عليك اشوفك بخير ولا لأ؟ ولو كنت بخير قلبي يخف
ولو مكنتش ادعيلك واما تبقي بخير افرح لان ربنا بيحبني فإستجاب لي ولانه بيحبك فخلاك بخير حتي لو مش أوي يعني
بس هو ربنا يعرف اكتر
يعني اما ييجي وقت النتيجه افضل متنحه حتي بعد ما اعرف اني نجحت لحد ما ينطق اسمك اضحك واقوم اكلم ابويا اقوله انا نجحت الحمد لله
يعني اما توحشني اوي اسألك ازيك عامل ايه؟ واستني ردك في ساعتها رغم انه بيتأخر
يعني ادعي ربنا ابقي بتاعتك بس ويبعد عني اي حد غيرك
يعني ادعي ربنا انه يخليني اسعدك ولو ربنا شايف اني مش هقدر يبعت لك اللي أحسن مني ويصبرني أنا
يعني ابقي عمري ما كلمتك وبرضه بحبك
يعني اما تبقي مش فاهم _يعني ايه انا أحبك _ يبقي نفسي اوي تغلط مره وتكلمني
ولما تفهم ابقي مش عارفه ازاي هعدي من جنبك بعد كده
يعني تبقي قاسي عليا شويه ومزعلش منك
يعني تخبط فيا ساعات كتير وأسامحك
يعني اما ببقي لوحدي ايام الامحانات احط لك كوبايه عصيرمعايا وانا برتاح من المذاكره
يعني اما اعيط اوي افتكر كلمه ليك ضحكتني مره فأضحك اوي زي ما بعيط اوي واصدق اوي انك افتكرتني نفس اللحظه دي
يعني احس ساعات انكـ بتفكر فيا مش تمام واقول يارب فهمه لانه مش فاهم حاجه
يعني يبقي نص كلامي مع انتيمتي عنكـ
يعني يبقي نص السجدات وانا بصلي بدعيلك فيهم
يعني تبقي معظم احلامي انت فيها
يعني الاقي نفسي تلقائي كده بكره حاجات إنت مش بتحبها وبحب حاجات بتحبها
يعني اما اهرج مع بابا ويضحك أوي اتخيلك مكانه
يعني اما توجعني اوي اروح لربنا اشتكيله منك وفي تاني دعوه اقول يارب متخادش علي كلامي انا بقول اي حاجه من زعلي بس
يعني كل الوشوش انت
وكل الضحكات انت وكل الناس انت
يعني تبقي واصل لكل نقطه في دمي
يعني أحس إنك إبني اللي بخاف عليه أوي
بحبكـ دي مش نقمه
دي نعمه
نعمه من نعم ربنا عليا إني بحب يعني أنا عايشه
بحبكـ دي مش حاجه عيب
دي حاجه جميله من ربنا
العيب هو في التصرفات مش المشاعر
العيب في التفريط مش في الاحساس
العيب إني أغلط عشان بحبكـ
وعشان بحبكـ دي حاجه كبيره أوي وعشان هي نعمه أنا مش هوسخها ابدا
وعشان بحبكـ دي صفه ربانيه أنا هخليها دايما حلال وهسكت هسكت كتير
وعشان بحبكـ ,, انا جوايا كلام وحاجات نفسي احكيها
كل يوم بكتبها وكل يوم بعينها واخبيها
واما اسجد ادعي وأقول
يارب ييجي اليوم اللي اوريك كل حاجه كتبتها عنكـ
يارب ييجي اليوم ده ,,,
