:: كلمه فـ حدوته ::

يوم २५ يناير २०११
مكنتش اعرف ان في ثوره

كان ابن عمي المصون بيقولي ان في مجموعه من الخارجين عاملين حاله هرج ومرج

ومتابعتش الموضوع الا لما عرفت ان ناس اعرفهم كويس اتسجنوا

قريت وفهمت

وفرحت بالشباب

وفـ معركه الجمل اتمنيت انهم يرجعوا لاني خفت عليهم بجد

بس هما كان عندهم قناعه وايمان باللي بيعملوه اكتر من اي حد قاعد في بيته وخلاص

كلمه فـ حدوته علي رأي المصريين ,, استقالت حكومه ,, اتخلع رئيس ,, بقينا احرار

مطالب الثوره اللي طلع بيها الشباب كانت واضحه من البدايه

حريه عداله ,, محاكمه المخلوع ,, البلد تنضف بقي اتخنقنا

وفرحنا

بس الشباب الصح كان عارف ان حتي خلع الرئيس ده مش اخر المطاف ده اوله

يعني احنا يدوب بنبتدي

وبعد فتره حوالي १०० يوم من تنحي الرئيس

حصل ايه ؟

المجلس العسكري بيعمل ايه ؟

هو ايه اتغير فـ البلد؟

هو ليه الثوره اتحولت لمجموعه ايفينتات علي الفيس بوك ,, ومجموعه اغاني وطنيه سخيفه

وفي ناس اسخف من الاغاني ركبتها بشكل مستفز

احنا بنتسرق

دلوقتي انت مذنب وبتكره البلد ومش عايز استقرار لو قررت تتكلم مع المجلس العسكري وتحاسبه

دلوقتي انت مينفعش تغلط ف الذات العسكريه وتقوله علي سبيل السؤال حتي هو ايه اللي بيحصل في المدنيين ومين الناس اللي بتموت دي؟

والمخلوع مش بيتحاكم ليه ؟

نفس طريقه التعامل مع الرئيس السابق

منزه عن الغلط

فله شمعه منوره ومحدش يحاسبه

لا مهو انا لازم افهم بيجري ايه ف البلد

فين الشرطه؟

مجلس عسكري ماشاء الله ووزير داخليه مش قادر ينزلهم الشارع ؟

والعذر المنتشر ان الناس بتموت الشرطه

هي فين الثوره يا جماعه حد يقولي؟

انا هعتبر محصلش ثوره

وحسني انتهت مدته ومشي
مفيش بوليس
في مواطنين بتتسحل
وناس بتتسجن
واسئله ممنوعه
وناس محاكمتها بتتأخر
وناس هتموت من الجوع

تعنت في الادارات عادي واكبر دليل الجامعه عندنا

ايه اللي اتغير معرفش ؟؟

مش بقولكم الثوره بقت عباره عن مجموعه اغاني وطنيه سخيفه

وبتقولي متنزلش بكره ؟

حاضر انت تؤمر

انت شايف سبب يخليني انزل اصلا؟؟

::أنا و أخي ::

في الطريق الي الجامعه
والجو حار والجميع متأزم ويتأفف من سوء الجو

دق هاتفي من رقم غريب لا اعلمه

لم ارد

ولكن بعد دخولي الجامعه دق مره اخري ,, قمت بالرد هذه المره لأجده صوت أخي يحدثني بنوع من الخبث

"ها إنتي فين؟"

*انا ف الكليه !*

"فين فـ الكليه "

* أكيد يعني مجيتش من ميونخ علي هنا بتسأل ليه؟ *

"طب بصي وراكي كده ! "

أنظر خلفي لاجده واقفا ينظر الي ضاحكا ضحكه عريضه احفظها عن ظهر قلب

اغمق عيني وافتحهما في عجب

*مش ممكن *

"ليه يعني مش ممكن ؟"

اقبل عليه بلهفه طفوله اعتدتها من حديثي معه ,,

وأضحك ملئ فمي ولا ادري من اين تتساقط هذه الدموع

وحين امد يدي لأسلم عليه

اجدني أتحسس الكرسي الامامي في السياره

لقد كنت أحلم

وللعجب لقد ظللت طوال اليوم أحدق في الهاتف في انتظار اتصاله علي انه واقع سوف يحدث حتما

لا ادري

ربما لم اكن انتظر اتصاله هو

فهناك الكثير في حياتي افتقدهم في وجودي اليومي وروتيني

أشعر بالفراغ والملل

واحيانا الحزن العميق علي اختفاء الجميع من حياتي دفعه واحده

واغالب هذا الشعور بشده واشعر انني اصبحت اقوي من اللازم صلبه جدا سهله الكسر

حتي وانا اكتب هذه التدوينه اغالب دموعي التي تريد ان تنهمر بشده

واغالب شعوري بالحنين لاي شئ

واغالب صور تأتي لذاكرتي في اوقات الحزن

ولا أدري الي متي سأظل اعيش هكذا ؟!

ولا اعرف متي سأنتهي الي حياه طبيعيه لا اعيشها في خيالي مع من احببتهم دوما وتركوني

ولكن لابد من نهايه ما

ولا ادري متي ستكون

كم اتمني لو اغمضت عيني لاجد كل ما اعيشه مجرد كابوس مفزع

وان كل الاشياء بخير

ولكن أكثر ما يؤلمني ان هذا الكابوس هو عين الحقيقه